Vermanın yeni klubu bəlli oldu

Almaniyanın “Borussiya” klubu Niderlandın PSV komandasının yarımmüdafiəçisi Yöi Vermanı transfer edib.

Sportify.az xəbər verir ki, 27 yaşlı niderlandlı futbolçu Dortmund təmsilçisi ilə 2031-ci ilin yayına qədər müqavilə imzalayıb.

“Borussiya” bu keçid üçün PSV-yə təxminən 22 milyon avro ödəyib. Transfer futbolçunun müqaviləsindəki sərbəstqalma maddəsinin aktivləşdirilməsi ilə reallaşıb.

Verman ötən mövsüm Erediviziyada 8 qol vurub və 14 məhsuldar ötürmə edib. O, assist sayında çempionatın ən yaxşı futbolçusu olub.

Yöi Verman PSV-nin heyətində 198 oyuna çıxıb, 31 qol vurub və 67 məhsuldar ötürmə edib. O, Eyndhoven klubu ilə üç dəfə Niderland çempionu olub və iki dəfə ölkə kubokunu qazanıb.