Türkiyə Futbol Federasiyasının Hakimlər Komitəsinin sədri saxlanıldı

Türkiyənin İstanbul şəhəri mərkəz olmaqla 4 vilayətdə “mobbinq” və rəsmi sənədlərin saxtalaşdırılması ilə bağlı əməliyyat keçirilib.

Sportify.az xəbər verir ki, əməliyyat zamanı Türkiyə Futbol Federasiyasının (TFF) Mərkəzi Hakimlər Komitəsinin (MHK) sədri Ferhat Gündoğdu, hakim və müşahidəçilərin də daxil olduğu 7 şübhəli saxlanılıb.

İstanbul Respublika Baş Prokurorluğunun apardığı “rəsmi sənədlərin saxtalaşdırılması” ilə bağlı istintaq günahsız şəxslərdən birinin ifadəsi əsasında başlayıb. İstintaq çərçivəsində şübhəlilərin “mobbinq” və “rəsmi sənədlərin saxtalaşdırılması” cinayətləri ilə əlaqəsinin araşdırıldığı bildirilib.

İstintaq zamanı açıq mənbələrdən əldə olunan məlumatlar, Maliyyə Cinayətlərinin Araşdırılması Şurasının (MASAK) və HTS məlumatlarının təhlili, şikayətçi və şahid ifadələri, eləcə də ekspert rəyləri əsasında MHK sədri Ferhat Gündoğdu və bəzi MHK üzvlərinin araşdırılan əməllərlə əlaqəsinin ola biləcəyi qiymətləndirilib.

Bununla əlaqədar İstanbul mərkəz olmaqla 4 vilayətdə eyni vaxtda əməliyyat keçirilib və 7 şübhəli saxlanılıb.

Saxlanılanlar arasında TFF Fəal Hakimlər Dərnəyinin sədri Ferdi Karadoruk, TFF Mərkəzi Hakimlər Komitəsinin sabiq sədr müavini Ahmet Şahin, MHK-nın sabiq üzvü Yunus Yıldırım, MHK üzvü və TFF-nin Təhsil və 4-cü Region üzrə məsulu Sebahattin Şahin, TFF Hakimlər və Müşahidəçilər Dərnəyinin İstanbul şöbəsinin təşkilati məsulu Alican Sağlar və TFF Hakimlər və Müşahidəçilər Dərnəyinin İstanbul İl Hakimlər Komitəsinin sədri Emre Kosif də var.

Türkiyənin ədliyyə naziri Akın Gürlek əməliyyatla bağlı bildirib ki, türk futbolunda etimadı sarsıdan iddiaların araşdırılması, məsul şəxslərin qanun qarşısında cavab verməsi və futbolun meydandakı zəhmət, mübarizə və idman prinsipləri ilə əlaqələndirilməsi üçün “təmiz futbol” mübarizəsi davam etdiriləcək.