Abdullah Zubir avrokuboklarda yubiley oyununa çıxdı

“Qarabağ”ın futbolçusu Abdullah Zubir avrokuboklarda 120-ci oyununa çıxıb.

Sportify.az xəbər verir ki, yubiley Bakıda Ukraynanın “Dinamo Kiyev” komandasına qarşı UEFA Konfrans Liqasının III təsnifat mərhələsinin cavab görüşünə təsadüf edib.

34 yaşlı vinger start heyətində yer alıb və komandasının qolunda yaxından iştirak edib.

Zubir “Qarabağ”ın hazırkı futbolçuları arasında ən çox avrokubok oyunu keçirən futbolçudur. Komanda tarixində bu göstəricidə liderlik sabiq müdafiəçi və kapitan Maksim Medvedevə məxsusdur – 126 matç.

Qeyd edək ki, ilk yarıdan sonra “Qarabağ” “Dinamo Kiyev”ə qalib gəlib – 1:0. Yeganə qolu Jali Muaddib vurub.