18 yaşlı Atletimiz 2 illik dopinq cəzası aldı - FOTO
Azərbaycan atleti Kənan Vəliyev antidopinq qayda pozuntusuna görə 2 il müddətinə idmandan kənarlaşdırılıb.
Sportify.az xəbər verir ki, bu barədə Azərbaycan Milli Antidopinq Agentliyinin (AMADA) mətbuat xidməti məlumat yayıb.
Bildirilib ki, idmançıya qarşı sanksiya antidopinq qaydalarının 2.3-cü maddəsinin pozulmasına görə tətbiq edilib. Həmin maddə idmançının nümunə toplanmasından yayınması, imtina etməsi və ya nümunəni təqdim etməməsini əhatə edir.
Vəliyevə tətbiq olunan 24 aylıq sanksiya 15 aprel 2026-cı ildə başlayıb və 15 aprel 2028-ci ildə başa çatacaq.
Qeyd edək ki, 31 mart 2008-ci il təvəllüdlü Kənan Vəliyev “Təhsil” Respublika İdman Mərkəzini təmsil edir. O, atletikanın nüvə itələmə və lövhə atma növləri üzrə ixtisaslaşıb. Yeniyetmələr arasında ölkə birinciliyinin qalibi olan Vəliyev, eyni zamanda böyüklər arasında keçirilən Azərbaycan çempionatlarının (həm qış, həm də açıq hava) bürünc mükafatçısıdır. İdmançının nüvə itələmə növündə şəxsi rekordu qapalı zalda 13.97 metr, lövhə atmada isə 46.13 metrdir.
No Comment! Be the first one.