Ayşən Abduləzimova: Çox səhv etdik, boynumuza alırıq – MÜSAHİBƏ – VİDEO

Azərbaycanın qadın voleybolçulardan ibarət milli komandasının kapitanı Ayşən Abduləzimova Bakıda keçirilən Avropa çempionatının C qrupunda Portuqaliya üzərində 3:1 hesablı qələbə qazandıqları açılış oyunundan sonra brifinq keçirib.

Təcrübəli oyunçu Sportify.az-ın da suallarını cavablandırıb:

– Portuqaliya üzərində qələbəni necə dəyərləndirirsiniz?

– Doğma azarkeşlərimiz önündə oynayırdıq. Həyəcan var idi. Evdə oynamaq bir qədər həyəcanlıdır. Burada azarkeşlərimizə çox “sağ ol” bildirmək istəyirəm, hamısı gəldi, hamısı dəstəklədi. 3:1 qazandıq, əsas qazanmaq idi. Çox səhvlər etdik, boynumuza alırıq. Gələn oyunlarda daha az səhvlə oynamalıyıq.

– Növbəti oyununuz İspaniyaya qarşı olacaq. Nə gözləyirsiniz?

– Düşünürəm ki, var gücümüzlə, daha az səhvlə oynasaq, məncə, yaxşı olar.

– Portuqaliya qrupun ən zəif komandası sayılır. Bu rəqiblə oyunda xeyli çətinlik çəkirsinizsə, daha güclü rəqiblərlə oyunlarda nəyə ümid edirsiniz?

– Dediyim kimi, həyəcan var idi. Oyunçularımızın müəyyən mövqe dəyişiklikləri oldu – bilmirəm fikir verdiniz, ya yox. Mövqe dəyişiklikləri oldu, oyunçular özlərini yeni mövqelərdə rahat hiss etmirdilər. Amma düşünürəm ki, önəmli olan qələbə idi.

– Qarşıdakı oyunlarda nəticələr necə olacaq?

– Yaxşı olacaq.

​- Qrupdan çıxmaq hədəfi yenə qüvvədədir?

– Məqsəd budur.