Mourinyo El-Klasikoda hakim təyinatı ilə bağlı narazılığını bildirdi

İspaniya təmsilçisi “Real Madrid”in baş məşqçisi Joze Mourinyo “Barselona” ilə qarşılaşmada hakim seçiminə deyil, təyinat prosedurunun şəffaflığına diqqət çəkib.

Sportify.az xəbər verir ki, “Real Madrid”in baş məşqçisi Joze Mourinyo İspaniya La Liqasının 10-cu turunda “Barselona”ya qarşı keçiriləcək El-Klasiko öncəsi hakim təyinatı ilə bağlı fikirlərini bölüşüb.

Portuqaliyalı mütəxəssis qarşılaşmanın Xuan Martinez Munuera tərəfindən idarə olunacağı ilə bağlı yayılan məlumatlara münasibət bildirib.

Mourinyo konkret hakimin təyinatından narahat olmadığını, lakin qaydaların pozulması ehtimalının onu düşündürdüyünü vurğulayıb.

“Matçın Neqreyranın oğlunun məşqçilik xidmətlərinə görə ödəniş edən Xuan Martinez Munuera tərəfindən idarə olunacağı barədə məlumat yayılıb. Bu, məni bir qədər təəccübləndirir. Mən heç vaxt hakimin adından narahat olmuram. Mənim üçün əsas olan hakimin yaxşı olmasıdır. Məni narahat edən qaydaların pozulmasıdır.

Üç həftə əvvəl bir ad ortaya çıxdı, indi isə başqa bir ad gündəmə gəlib. Lakin heç kim mənə daxildən onun hakim olmayacağını deməyib”, – deyə AS nəşri Mourinyonun sözlərini sitat gətirib.

Qeyd edək ki, mövcud qaydalara əsasən, qarşılaşmanın baş hakiminin adı oyundan 24 saat əvvəl açıqlanmalıdır. Bununla belə, El-Klasikoda mümkün hakim təyinatı ilə bağlı məlumatın üç həftə əvvəl yayılması müzakirələrə səbəb olub.

Xatırladaq ki, “Barselona” ilə “Real Madrid” arasında keçiriləcək La Liqanın 10-cu turunun oyunu oktyabrın 25-də baş tutacaq. Qarşılaşma Bakı vaxtı ilə saat 23:00-da başlayacaq.