Nihat Məmmədli ikiqat dünya çempionu ola bilmədi

Qazaxıstanın paytaxtı Astanada keçirilən dünya çempionatında Azərbaycan yunan-Roma güləşçisi Nihat Məmmədli final görüşünə çıxıb.

Sportify.az xəbər verir ki, 63 kq çəki dərəcəsində rəqib Ermənistan təmsilçisi Karen Aslanyan olub.

Qarşılaşmadan 4:8 hesablı məğlubiyyətlə ayrılan Məmmədli gümüş medal qazanıb.

Qeyd edək ki, bu, Karen Aslanyanın ilk dünya çempionluğu və ilk titulu olub. Nihat Məmmədli isə 2024-cü ildə dünya çempionu adını qazanmışdı. Məmmədlinin aktivində 2 Avropa çempionluğu da var.

67 kq çəki dərəcəsində mübarizə aparan Həsrət Cəfərov isə üçüncü yer uğrunda görüşdə Qazaxıstan təmsilçisi Bağdat Sabazla qüvvəsini sınayıb. O, rəqibinə 5:7 hesabı ilə məğlub olub və beşinci yerlə kifayətlənib.

Qeyd edək ki, mundial noyabrın 1-də başa çatacaq. Daha əvvəl yunan-Roma güləşçilərindən Eldəniz Əzizli (55 kq) və Sənan Süleymanov (77 kq) qızıl medal qazanıb.

Beləliklə, yunan-Roma güləşi üzrə milli komanda dünya çempionatını 3 medalla başa vurub.