Rəşad Eyyubov: Hiss edirdim ki, uşaqlara çətindir

“Əsas odur ki, yaxşı nəticə əldə etdik”.

Sportify.az xəbər verir ki, bunu 21 yaşadək futbolçulardan ibarət Azərbaycan milli komandasının baş məşqçisi Rəşad Eyyubov AVRO-2027-nin seçmə mərhələsində Çexiya ilə 1:1 hesablı heç-heçə etdikləri oyundan sonra keçirilən brifinqdə deyib.

Mütəxəssis qarşılaşmanın intensivliyinin yüksək olduğunu bildirib: “Hiss edirdim ki, uşaqlara çətindir. Çünki oyun praktikasında çatışmazlıqlar var idi”.

R.Eyyubov ilk oyunda Çexiyaya 0:5 hesabı ilə məğlub olmalarına da münasibət bildirib:

“Birinci oyundan 3-4 gün əvvəl milliyə gəlmişdim. Uşaqların çoxunu yaxşı tanımırdım. Bu oyun bizim üçün tam fərqli oldu. Top rəqibdə olarkən başqa cür oynayırdıq”.

Baş məşqçi əsas millidə çıxış edən futbolçuların U-21-də yer almasının nəticəyə təsiri ilə bağlı suala belə cavab verib: “Uda da bilərdik, uduza da. Dəqiq cavab verə bilmərəm”.

O, Rüfət, Edqar, Oruc və Rəvanın əsas milliyə layiq olduğunu qeyd edib.

Çalışdırıcı qarşıdakı görüşlərlə bağlı proqnoz vermək istəmədiyini söyləyib: “Proqnoz verməyi xoşlamıram. Oyunlara hazır olmalıyıq. 3-4 gün ərzində oyunçuları bərpa etməli və yaxşı oyun göstərməliyik”.

Baş məşqçi Lorentso Mezotteronun çıxışından razı qaldığını bildirib:

“Birinci toplanışa baxanda indi oyun tərzini daha yaxşı başa düşür”.

Gənc mütəxəssis U-21 millisinin əsas hədəfinin əvvəlki ən yaxşı nəticəni yaxşılaşdırmaq olduğunu vurğulayıb:

“Tariximizdə ən çox 9 xal toplamışıq. Bu nəticəni yaxşılaşdırmaq istəyirik”.

Nəriman Axundzadənin çıxışını da dəyərləndirən mütəxəssis onun oyunundan tam razı qaldığını deyib:

“Toplanış zamanı özünü çox peşəkar aparırdı. İnanıram ki, növbəti oyunlarda da bizə xeyir verəcək”.

Baş məşqçi aşağı yaş qruplarından U-21-ə namizəd futbolçuları izlədiklərini, lakin onların sayının az olduğunu bildirib.

Legioner limitinin ləğvinin buna təsir etdiyini deyən baş məşqçi fikrini belə ifadə edib: “Əlbəttə, edir. Amma mən hər bir limitə qarşıyam. Düşünürəm ki, kim yaxşıdırsa, o da oynamalıdır”.