Valdas Dambrauskas: Süni örtükdəki üçüncü matçımızda da qalib gəlməyə çalışacağıq

“Sabah” komandasının baş məşqçisi Valdas Dambrauskas Norveçdə “Vikinq”ə qarşı keçirəcəkləri UEFA Çempionlar Liqasının əsas mərhələsinin IV tur matçından əvvəl mətbuat konfransında maraqlı fikirlər səsləndirib.

Sportify.az həmin açıqlamaları təqdim edir:

— Siz keçmişdə və seçmə mərhələdə süni örtüklü meydançada oynamğın sizi qorxutmadığını demisiniz. Bu qarşılaşma haqqında nə düşünürsünüz, xüsusən də Liqa mərhələsində “Vikinq”in ev oyunlarında nələrə qadir olduğunu gördükdən sonra?

— Bəli, bu, Çempionlar Liqasında süni örtüklü meydançada oynayacağımız üçüncü matçdır. Biz Uelsdə TNS-ə, Finlandiyada isə “KuPS”a qarşı oynamışıq. Həmin oyunların ikisini də qazanmışıq, ona görə də burada da eynisini etməyə çalışacağıq. Əlbəttə, “Vikinq”in əvvəlki oyunlarda nə etdiyini deyəndə nə nəzərdə tutduğunuzu başa düşürük. Əlbəttə ki, biz hər oyununu izləyirik və hər matça baxırıq. Biz gördük ki, hətta “Bavariya” da burada əziyyət çəkdi, amma nə edə bilərik? Əgər bu qanunidirsə, FİFA və UEFA süni örtüklü meydançalarda oynamağa icazə verirsə, biz qaydalara tabe oluruq. Həqiqətən də düşünmürəm ki, bu, həlledici amil olacaq. Həlledici amil başqa yerdə olacaq. Bu, hansısa taktiki, texniki, mental detallar, bəlkə də ab-hava olacaq, lakin meydançanın keyfiyyəti olmayacaq.

— Süni örtüyün qadağan olunmalı olduğunu düşünürsünüzmü?

— Xeyr. Mən düşünmürəm ki, buna cavab vermək üçün kifayət qədər səlahiyyətliyəm, amma baxın, mən universitetdə oxuduğum vaxt süni örtüklü meydançalar haqqında çox danışılırdı. Bildiyim qədər, onların daha çox zədəyə səbəb olduğu və ya daha çox zərər vurduğu sübut olunmayıb. Xüsusilə, mən həm də Litvadan gəlirəm və bilirəm ki, Litvada mövsüm başlayanda mayın əvvəlinə və ya aprelin sonuna qədər ot üstündə oynamaq mümkün olmayan ağır iqlim şəraitində oynamaq necə bir şeydir, biz süni örtüklü meydançalarda, hətta qapalı məkanlarda oynayırıq. Çünki təəssüf ki, iqlim belədir və biz uyğunlaşmalıyıq.

— Sıx təqvimdə çoxlu oyunlar keçirmisiniz. Hər hansı zədəli oyunçular, sağlamlıq problemləri varmı, yoxsa bütün komanda formadadır?

— Çoxlu oyunlar keçirəndə, əlbəttə, həmişə hansısa zərbələr, bəzi zədələr olur, həmişə kimsə növbəti oyundan əvvəl formaya düşmək üçün yarışır və bu, doğrudan da çətindir. Məsələn, bu bazar günü, qarşıdan gələn bazar günü milli komandanın fasiləsindən sonra ilk oyuna başladığımız vaxtdan 28 gün keçəcək və həmin 28 gündə bu, bizim səkkizinci oyunumuz olacaq. Deməli, biz hər 3-4 gündən bir oynayırıq. Təbii ki, bu, asan deyil, amma yenə də bu, hamımız üçün bir arzudur. Bir çoxları üçün arzudur və düşünürəm ki, Çempionlar Liqasında olmayan hər bir oyunçu mənim oyunçularımla yer dəyişməyə razılaşardı. Avropada Çempionlar Liqasında olmayan istənilən komandanın texniki heyətinin hər bir üzvü bizimlə yerini dəyişməyə razılaşardı. Ona görə də biz harada olduğumuzdan məmnunuq. Sabahkı günə gəlincə, mən inanuram ki, biz ən yaxşı, ən fiziki cəhətdən hazır və oyuna hazır olan 23 oyunçunu seçmişik, lakin onlardan bir neçəsi ilə bağlı qərarları bu axşamkı məşqdən sonra verəcəyik.

— Matçdan əvvəl əsas diqqət mərkəzinizdə nə olub?

— Əsas diqqət, təbii ki, növbəti oyundan əvvəl komandanı bərpa etməkdir. Çünki biz ötən cümə günü çox çətin oyun keçirmişik. Bu, təkcə çətin oyun deyil, həm də səfərdir. Biz dünən Norveçə 5 saat uçduq, lakin son oyunumuzdan əvvəl də qatarda həmin matçı oynamaq üçün Tovuza 6 saatlıq səyahətimiz oldu. Oyunu keçirdik, 6 saatlıq geri səyahət, gecə saat 4-də Bakıya qayıtdıq. Əlbəttə ki, bərpa vaxtı həqiqətən daralır və siz daha çox bərpa vaxtı istəyirsinizsə, məşq vaxtını itirirsiniz. Ona görə də bu, həmişə əlaqəlidir və oyunçuları təzə və sağlam saxlamaq ən böyük çətinlikdir. Bu da tibbi heyətdən və məşqçilər korpusundan asılıdır.

– “Vikinq”lə qarşılaşma ilə bağlı fikirləriniz necədir və

– Taktiki hazırlıqdan danışırıqsa, məncə, digər oyunlardan əvvəl olduğu kimi hazırlaşmışıq. Sadəcə gedib oyunları izləyirik və inanıram ki, “Vikinq”lə üz-üzə gələndən bəri biz yerli liqada və Çempionlar Liqasında onların bütün oyunlarını görmüşük. Görürük ki, bu komanda həqiqətən nə qədər yaxşıdır. Mən son bir neçə ildə Norveç futbolu haqqında gördüklərim barədə danışa bilərəm. Çünki son bir neçə ildə “Bodo-Qlimt” həqiqətən zirvədə idi və bütün Avropanı təəccübləndirdi. İndi isə “Vikinq” gəldi və onları üstələdi. Əgər Norveç liqasına baxsanız, onların nə qədər yaxın olduğunu və yəqin ki, son oyna qədər baş-başa, xal-xal gedəcəklərini görərsiniz. Bu, həqiqətən fantastik yarışdır və burada nə qədər yaxşı oyunçular var. Əlbəttə, Çempionlar Liqasında “Aston Villa”ya və “Bavariya”ya qarşı həmin oyunlar özü üçün danışır. Bu komandanın nə qədər qorxusuz, səhv etməkdən qorxmadan oynadığı, nə qədər risk etdiyi həqiqətən inanılmazdır. Bu, bir çox məşqçilər və oyunçuları inkişaf etdirmək istəyən bir çox klublar üçün nümunədir. Bir çox klublar hücum futbolu oynamaq istədiklərini deyirlər, lakin çox azı bunu edir. Bu çox az sayda klublar arasında Norveç komandaları da var və son illərdə Avropada məhz bu səbəbdən çox uğurludurlar.

— Siz 2000-ci ildə Norveçə iş səfərində olmusunuz və bu, sizi çox ilhamlandırıb. Həmin səfərdə nə baş verdiyi barədə biraz danışa bilərsinizmi?

— Düşünürəm ki, bu iş səfərləri kifayətdir, çünki bilirsiniz, insanlar 20 il əvvəl etdiklərimə deyil, indi nə etdiyimə daha çox diqqət yetirirlər. Amma bəli, bu doğrudur, mən burada Norveçdə təxminən üç yarım, dörd aya yaxın Kristiansunda olmuşam. Bəli, bu çox uzun müddət əvvəl olub və həqiqətən təəccüblənirəm ki, 26 ildən sonra mən yalnız indi Norveçə qayıdıram. Bu, həqiqətən gözəldir, yenidən burada olmaq inanılmaz hiss etdirir. Xüsusilə də düzgün səbəblərdən, futbol səbəblərindən, başqa səbəbdən deyil.