Bellinqem ilk dəfə İngiltərə millisində

Dortmund “Borussiya”sının yarımmüdafiəçisi Cob Bellinqem karyerasında ilk dəfə İngiltərə millisinin əsas komandasına dəvət olunub.

Sportify.az xəbər verir ki, o, baş məşqçi Tomas Tuhelin noyabr ayında Xorvatiya və İspaniya ilə keçiriləcək Millətlər Liqası oyunları üçün açıqladığı 25 nəfərlik heyətdə yer alıb.

İlk dəfə milliyə çağırılan digər futbolçu “Fulhem”in yarımmüdafiəçisi Coş Kinqdir. Hər iki oyunçu daha əvvəl İngiltərənin gənclərdən ibarət yığmasında çıxış edib.

Beləliklə, Cob böyük qardaşı, “Real Madrid”in yarımmüdafiəçisi Cud Bellinqemlə eyni milli komandada çıxış etmək imkanı qazanıb. Coş Kinq isə 2026-cı il dünya çempionatı öncəsi ABŞ-ın Florida ştatında keçirilən təlim-məşq toplanışında əsas komandaya qoşulmuşdu.

Zədə səbəbindən əvvəlki toplanışı buraxan “Arsenal”ın yarımmüdafiəçisi Deklan Rays və “Tottenhem”in müdafiəçisi Ced Spens yenidən heyətə qayıdıblar. Ben Uayt isə mart ayından sonra ilk dəfə milliyə dəvət alıb.

Bununla yanaşı, “Çelsi”nin yarımmüdafiəçisi Koul Palmer və “Mançester Siti”nin futbolçusu Fil Foden heyətdən kənarda qalıblar.

Qeyd edək ki, İngiltərə millisinin kapitanı Harri Keyn indiyədək milli formada 125 oyun keçirib. O, bu göstəricidə qapıçı Piter Şiltonla rekord şərikidir. Növbəti matçda meydana çıxacağı təqdirdə Keyn İngiltərə millisinin tarixində ən çox oyun keçirən futbolçu olacaq.